En nome de Aegama deu a benvida aos directivos e socios da entidade o seu xerente, José Cerdeira, que conduciu posteriormente o acto xunto co vicepresidente para Pemes de Aegama, Casimiro Maseguer.

Meseguer defendeu que a dureza do mundo dos negocios diminúe “cando podemos tratar con persoas ás que coñecemos e, se fose posible, das que somos amigos”, subliñando que o obxectivo do encontro era precisamente “presentarnos e achegarnos entre nós para establecer amizade” e facer crecer as posibilidades de facer negocio. Un segundo obxectivo era “o compromiso individual” dos asociados de “difundir e prescribir o produto dos nosos compañeiros”.

Os directivos de Aegama foron nomeando un por un aos novos asociados e lendo unha breve presentación de cada un tras a cal os interesados tiveron un minuto para completar a información ofrecida.

Tras as presentacións, Cerdeira deu paso a unha actuación de maxia a cargo do ilusionista Luís Boyano, titular da firma Soluciones Máxicas, asociada de Aegama, por aquilo de que “ás veces as dificultades multiplícanse e hai que facer maxia para pasar o fatídico fin de mes”, segundo explicou Cerdeira. Boyano puxo unha nota de asombro entre os asistentes antes de que pasasen ao tempo reservado para establecer contacto entre os socios (“networking”).